လျှာအရသာအသစ်ကို ရှာဖွေနိုင်ဖို့ ခံတွင်းတွေ့စေမယ့် ထမင်းသုပ်လေး လုပ်စားကြရအောင်

တစ်နေ့ တစ်နေ့ ထမင်းဖြူနဲ့ဟင်းတွေချည်းစားနေရလို့ ငြီးငွေ့နေကြပြီလား?? အပြောင်းအလဲလေးဖြစ်သွားအောင် အလွယ်တကူရှိနေတဲ့ ထမင်းတွေကိုသုပ်စားကြရမကောင်းဘူးလား ?? တခါတလေမှာ မထင်မှတ်ပဲလုပ်စားဖြစ်တဲ့ အစားအစာတွေက ခံတွင်းပိုတွေ့တတ်ပါတယ်။ ထမင်းသုပ်ဖို့လိုအပ်တဲ့ ပါဝင်ပစ္စည်းတွေကလည်း နေ့စဉ်မီးဖိုချောင်မှာ အသုံးပြုနေကျ အသင့်ရှိပြီးပစ္စည်းတွေဖြစ်တာကြောင့် အထွေအထူးအလုပ်မရှုပ်စေပါဘူးနော်။

လိုအပ်တဲ့ပါဝင်ပစ္စည်းတွေကတော့-

  • -ထမင်း (နို့ဆီဗူး(၁)လုံးချက်)
  • -ပဲဆီ (ဇွန်းခွက်ကြီး(၁)ဇွန်း)
  • -ကြက်သွန်နီ (၂)လုံး
  • -ကြက်သွန်ဖြူ (၅)မွှာ
  • -ပုဇွန်ခြောက်မှုန့် (ထမင်းစားဇွန်း(၂)ဇွန်း)
  • -ပဲအကျက်မှုန့် (ထမင်းစားဇွန်း(၂)ဇွန်း)
  • -မန်ကျည်းရည် (ထမင်းစားဇွန်း(၂)ဇွန်း)
  • -ငံပြာရည် (ထမင်းစားဇွန်း(၁)ဇွန်း)
  • -ကြက်သားမှုန့် (ထမင်းစားဇွန်း(၁)ဇွန်း)
  • -ငပိစိမ်းစား (လက်ဖက်စားဇွန်း(၁)ဇွန်း)
  • -ငရုတ်သီးအကျက်မှုန့် (လက်ဖက်စားဇွန်း(၁)ဇွန်း)
  • -ခရမ်းချဉ်သီး (၂)လုံး

 

ထမင်းသုပ်စားမယ်ဆိုရင်တော့ ထမင်းပူဆိုရင်တော့ စီးစီးကြီးဖြစ်သွားတတ်တဲ့အတွက် ထမင်းကိုအအေးခံထားပါ။ ကြက်သွန်ဖြူကိုပါးပါးလှီးပြီး ဆနွင်းမှုန့်အနည်းငယ်ထည့်ထားတဲ့ ပဲဆီပူပူထဲကိုထည့်ကာ ဆီချက်ပြုလုပ်ပါ။ခရမ်းချဉ်သီးနဲ့ ကြက်သွန်နီတွေကို ခပ်ပါးပါးလှီးထားပြီး မန်ကျည်းရည်ပျစ်ပျစ်လေးဖျော်ထားပါ။

ထမင်းအေးသွားပြီဆိုရင်တော့ နယ်လို့အဆင်ပြေနိုင်မယ့် ဇလုံတစ်ခုထဲထည့်ပြီး ငပိစိမ်းစား ၊ လှီးထားတဲ့ကြက်သွန်နီနဲ့ ခရမ်းချဉ်သီ၊ ပုဇွန်ခြောက်မှုန့် ၊ ပဲအကျက်မှုန့် ၊ ငံပြာရည် ၊ ကြက်သားမှုန့် ၊ ငရုတ်သီးအကျက်မှုန့် ၊ မန်ကျည်းရည်တို့ကိုထည့်ပြီး သမအောင်နယ်ပါ။ အပေါ့အငံကိုတော့ လိုသလိုပြုပြင်လို့ရပါတယ်နော်။

အရသာအစပ်အဟပ်တည့်တဲ့ ထမင်းသုပ်လေးရသွားပေမယ့် အရံလေးတွေလည်း ထပ်ထည့်ချင်သေးတယ်ဆိုရင် သခွားသီးချဉ် ၊ ကြက်ဥကြော် ၊ ကြက်အူချောင်းကြော်တွေနဲ့ တွဲဖက်စားသုံးမယ်ဆိုရင်တော့ လုံးဝကိုပြီးပြည့်စုံသွားမှာ အသေအချာပါပဲ။ သခွားချဉ်ကိုတော့ သခွားသီးကိုပါးပါးလေးလှီးပြီး ကြက်သွန်နီ ၊ ရှာလကာရည်တွေကိုရောနယ်ပြီး ပြုလုပ်လို့ရပါတယ်နော်။

Leave A Comment

Your email address will not be published. Required fields are marked *